Maqaal:- Kulanki ay beesha H-gidir ku taageertay AAWarsame.

AAWarsame iyo Taageerayaashiisa.

Somaalidu waa bulsho rumeysan diinta Islaamka, heysta dhaqan iyo ilbax-nimo suuban oo ay dhigooda kaga sarreyan, waa is dhowrte-yaal aan kala maarmin naq iyo jiilaal-ba, waa dhiirfoona-yaal dhowrta kooda indheer-garadka ah ee howl-karnimo iyo hibooyin Eebe ugu deeqay lagu arkay, waa deeqsi-yaal aan hagardaamada iyo haddimooyanka la jecleyn hoggaankooda, waa umad hodan ku ah is cafiska, isku calool furnaanta, is casuumidda iyo isla caweynta,  waa dad ku dhaqma nidaamka ah ‘tol waa tolane’ iyo ‘tol xeer leh xantiir ma leh’.

Sidaas oo ay tahay qarniyaal badan oo jiritaakeenna ah iyo 60 sano kadib dowlad-nimadeenna ma joogno meeshi iyo mansab-ki nagu haboonaa ee aan u qalanay in aan ka ciyaarno Afrikada madow iyo adduun weynaha baratanku ka dhaxeeyo, waxaana taas loo aaneeyaa hoggaan xumo daris nala ah tan yo xornimadeenni, diihaal-ka dowlodnimo ee naga muuqatana waa mid ay abuureen habacsayaal ku xad-gudbay xilal loo igmaday -Abuses The Position.

Maqalka shir ama kulan qabiil ee dhagahaada kusoo dhaca waxaa laga yaaba in aad durba tiraahdid waa durbaan colaadeed, gocatid-na shirar-ki guubaabada iyo kicinta qabiilka, kibir-ki iyo faanki geel kala dhicidda ee Somaalidu dhaqanka u lahayd, hayeeshee Isbadal-ka waayuhu waa cajiib oo galinba waa ceyn, waxaan qoraalkan gaaban uga hadlayaa Kulan Muqdisho ka dhacay oo ay Beesha Habar-gidir taageero ugu muujisay hoggaamiyaha Xisbiga Wadajir Cabdiraxmaan Cabdishakuur Warsame.

Somaalidu waxay dhahan dhib iyo dheefba adduun-ku waa meerto, oo ula jeedku yahay barwaaqo iyo baraare laguma waaro, silac iyo darxumna abid laguma jiro, oo ninki nool isbadalka maalmo adduun waa is dhadhamin, waxaan ula jeedaa bal in aan ku dajiyo si aadan sas  uga qaadin magaca qabiilka, kuuna sheego is badal-ka dhacay iyo u jeedada kulanka. Hillaac biyihiis waa caddeeyaa, Kadib doorashadi Golaha Hogaaminta Beesha Habargidir (GHHG) ee Magaalada Hobyo Borofesoor Cabdiqaadir Maxamed Shirwac wuxuu si maldahan carabka ugu dhuftay in golohu uu hoowlihiisa hor-tabinta leh ku dari doono kala saaridda siyaasiyiinta beesha ka dhashay ee u dig iyo dam leh qabashada xilal-ka heer maamul goboleed iyo mid federal-ba, isagoo taas ka duulaya AAWarsame wuxuu beelweynta weydiistay garab-istaag iyo taakeero, taas ayaan keentay kulanka dhacay 29-ki bishi 9, 2020-ka.

26 Sebtembar 2020, Baarlamaanka Soomaaliya ayaa ansixiyay heshiiskii doorashada ee ay gaaraeen MW JFS, Md. Maxamed A. Farmaayo iyo Madaxda maamul goboleedyada, taas oo meesha ka saartay doorashadi Qof iyo Cod (One Person, One Vote ) ee qorshuhu ahaa in ay dalka ka qabsoonto xilli doorasheed-ka hadda loo dareeray, sidaas daraadeed maadaama dalku dib ugu laabtay doorasadi dadbaneyd, MR. Warsame kulankan iyo taageerada uu H-Gidir ka helay waxa ay ugu soo aaday xilli u miihiim ah musharxnimadiisa marka loo eego siyaasiyiinta kale ee ay isku heeybta yihiin ee damaca musharaxnimo ku jiro. Ragga daawadiis waa inuu kala danbeeyaaye, oo darajo wayn loo qiraa, kan ugu door-roone.

Qoraaga Mareykanka ah ee Mark Skousen ayaa laga hayaa inuu yiri “Marnaba ma bedeli karno hogaamiye-yaasheenna siyaasadda Ilaa aan badalno dadka doorta”. “We shall never change our political leaders until we change the people who elect them. Sidaas oo kale waa dhaqan muhiim ah oo bogaadin iyo ku dayasho mudan in beeluhu iska soo saran oo ay doorashada u soo diraan siyaasiga ay ku tuhmayaan hoggaamin wanaagsan, si dadka u codeynaya ay kala doorashadu ugu fududaato, dalkuna hoggaan-san ku helo.

Adduunyadan qofkii suubanaa suuqa lagu caayo

Adduunyadan sinaantiyo sharciga laga santaagaayo

Adduunyadan sawiran ee lahayn sal iyo raad-toona

Adduunyadan salaxan ee ka maqan sababihii khayrka

Adduunyadan siqiirkuna ogyahay ee sinta u jiifta.  W/T: Abwaan Cali Cilmi Afyare.

“Ummad kasta waxaa sal u ah horumarkeeda isbedel joogta ah oo bulshadeeda ku dhaca kaasoo saamayn ku yeesha sida ay bulshadaasi nolasha u aragto, hab-dhaqankeeda bulsho, qiyamkeeda siyaasadeed iyo habkeeda dhaqan dhaqaale. Isbedelku iskama yimaado ilaa ay si go’an oo dareen hufan  leh indheergaradkeeda iyo hoggaanka bulshada u  dareemaan baahidiisa, islmarkaana hay’adaha sida tooska ah bulashada raadeeya ay ka hawlgalaan arrinkan”. (AAWarsame).

Maanta dalku wuxuu taagan yahay kala-beyr adag, wuxuu u baahan yahay hor-seede leh garasho dheeri ah iyo xilkasnimo balaaran, hayaanshe la hubo oo aqoon, karti, waaya-eargnimo, dulqaad, diin, dareen-dowladnimo, dadnimo, degenaan, kalsooni, faham iyo xeeldheera-nimo rabbi siiyay, ahna wadani diyaar u ah in uu dalka ka samata bixiyo mashaqada margiyada jartay ee mugdiga jahliga, musuqa iyo cadaalad-darrada, quursiga iyo isla qabweynida, qabyaaladda, qaadka iyo  wax walba oo dowlad la’aanta sababay, isla markaana ah nin hir-galin kara iftiinka aqoonta, cadaalad loo dhan yahay, tubta nabadda, sinnaanta, sharaf, karaamo, iyo is-ogol, isla guddoomin, iyo isku tanaasul.

Qof garaad leh laba goor god lagama qaniino, ayay mahmaah ahayd, Abdirahman A. Warsame waa nin buuxin kara kana bixi kara astaamaha kor ku xusan, qeyb ka mid ahna ay hal-ku-dhig u yihiin isaga iyo xisbigiisa Wadajir, waana nin dulqaad-ka u saaxiib ah, waya-aragnimo iyo faham siyaasadeedna Rabbi siiyay , maaha afgarooc aan dadkiisa hadalka deeqsiin karin ee waa af-tahan si fudud u kara erayada uu oran rabo, waa nin kasa, kara oo aan runta ka gamban. “afku wuxuu la xoog yahay magliga xawda ka jara”. Qofba inta uu midka kale ka hadal aqoonsan yahay wuu ka heybad badan yahay, kana gaari og-yahay hiigsiga iyo himilooyinka loo socdo. Haddi 2017 ay Soomaaliya ka il-duuftay in ay xilka Madaxweynimo u dhiibtaan Warsame, mar kale 2021-ka waxaa jirta fursado kale oo uu dalka kaga faa’iideyn karo ee fadlan doorta.

Saddex saddex bay ka tagtaa:- Roobku rays buu ka tagaa, Raggu ra’yi buu ka tagaa, Raaliyo haweenna raas bay ka tagtaa-bey Soomaalidu dhadaa, aan tan raga soo qaate Mr. Warsame waa siyaasi ra’yi muuqda leh oo jiil-keenna hadda iyo mustaqbalka uga tagaya dhaxal siyaasadeed oo manfac fiican u yeelanaya qofki wadadaas qaada, u howl-gala una hirgasho. Sidoo kale mahmaahyada Saddex-leyda loo yaqaan  waxaa ka soo qaadanayaa mid kale oo oraneysa, Saddex buu raggu is-dheer yahay:- Garashada waxa soo socda, Wax ka qabashada waxa jooga iyo ka samridda wax tegay, aqriste tan danbe noo micney kadibna ku dabaq inta aad ka taqaanid AAWarsame.

Waxaa jirta dood leh wixii ugu mihiimsanayaa ee laga faa’iiday geedi socodki nabadda tan iyo burburkii dowladda wuxuu ahaa heshiiskii 2008 ee dawladda KMG ahayd iyo Isbaheysiga Dib U-xoreynta ku dhex maray dalka Jabuuti, AAWarsame wuxuu shirkaas ka ahaa garwadeen(Chief Negotiator), wuxuuna ka mid ahaa masuuliinti ugu mihiimsanaa ee sababay in kadib 2008 aan dibad loo raadin heshiis lagu dhisayo dowladnimo Soomaaliyeed, maadaama uu dalka ka soo gudbiyay marxalad adag waxaa jirta fursado kale oo uu dalka kaga faa’iideyn karo ee fadlan doorta.

Aqoontiisa iyo aragtidiisa siyaasadeed, ogaalkiisa xaaladaha nagu xeeran iyo marxaladaha jira, ka war qabkiisa loolanka dariska, baratanka adduunka iyo fahamka uu u leeyahay danaha uu dalkeennu leeyhaay iyo kuwa laga leeyay, damaciisa u aadan sal u dhigidda xasiloonida siyaasadda Soomaaliya, intaas iyo ka badan marka ay beel-weynta H-gidir aragtay waxa ay siyaasigaan Soomaaliyeed ku taageereen mushaxnimadiisa, marxaladda dalku jiro xilliga qofki ku haboonaa ee darka loo  dhiibi lahaa waa AAWarsame ee Soomaaliyeey fadlan doorta.

Ugu danbeyn, waxaan ku soo xirayaa qoraalka, Salaan aan u dirayo Hoggaamiyaha, waxaan kuu rajeynayaa guul, waxaan kaa filayaa haddi rabbi kursiga kuugu guuleeyo in aad noqotid sama-ka-taliye dadka isku wada, dalka hormariya, dastuur-ka ilaaliya, dhisa ha’yadaha dowliga ah ee aan isagu shaqsi ahaan is dhisin. Waxaan ahay mid ka mid ah taageerayaashaada guuleyso.

Aqriste haddi aad ilaa halkan soo gaartay aadna aqrisay dhamaan qoraalkan adigana guuleyso. Mahadsanidiin.

Wabillaahi Towfiiq.